सुंदर शब्द…

संपतराव आपल्या पत्नीवर ओरडले होते. त्यामुळे त्या रूसून होत्या व मोबाईल विनाकारण चाळत होत्या . कोपऱ्यात जाऊन बसल्या नव्हत्या त्या इतर बायकांसारख्या (म्हणून मी फक्त रूसून होत्या असे लिहिले आहे). (नाही तर त्यांच्या हाती यावेळी मोबाईल ऐवजी लाटने दिसले असते.😊) तिची हिच विशेष बाब संपतरावांना मनापासून आवडते (लाटण्याची नाही हो फक्त रूसून असण्याची बसण्याची नव्हे, काय राव परत परत तेच तेच सांगावे लागतेय मला) आणि यामुळेच ते प्रत्येक वेळा स्वतः पुढे होऊन त्यांचा रूसवा काढण्यासाठी जवळ जातात.

पण आज उलटेच झाले. सौ. समोरून आल्या. त्यांनी संपतरावांना हसवण्यासाठी प्रयत्न केला पण, हे काय? त्यांचा तो प्रयत्न फसला. इतकेच नव्हे तर चांगलाच अंगलट ही आला. झाले असे कि गंमत केली कि ते हसतील असे त्यांना वाटले. म्हणून त्यांनी व्हाट्सएपवर आलेला खालील संदेश संपतरावांना वाचून दाखविला.

शरीर सुंदर असो किंवा नसो
पण शब्द सुंदर असले पाहीजेत
कारण लोक चेहरा विसरतात
शब्द नाही.

💞 शुभ सकाळ 💞

संपतरावच ते. त्यांनी क्षणाचाही विलंब न करता उलट विचारले, “काय तुम्हाला काय म्हणायचे आहे कि ‘तुम्ही सुंदर नाहीत'”. आणि हे ऐकून सौं.चा चेहरा बघण्यासारखा झाला. “अहो काय बोलताय तुम्ही?”

“मी कुठे काय बोलतोय. तुम्हीच तर म्हणालात.”

“जा बुआ. तुम्ही प्रत्येक वेळी थट्टा करून वेळ मारून नेतात.”

“बर बर. तुमच म्हणणं नेमकं काय आहे? ते तरी कळू द्या आम्हाला. तुम्ही सुंदर आहात न!!” सौ. लाजल्या.

“अहो, हे म्हातारपणी काय….”

“सॉरी बर का!! पण तुमचे शरीर आणि शब्द दोन्ही सुंदर आहेत बर का?”

“तेच म्हणत होते मी. माझे आहेत हो पण तुमचे नाहीत न. म्हणून तर तो संदेश दाखवित होते मी.”

“मी काय केले??”

“आताच माझ्यावर खेकसला होता. विसरले सुद्धा इतक्या लवकर!!”

“पुन्हा एकदा सॉरी म्हणतो. झालं!!”

आणि दोन्ही खूप हसले. हसरी सकाळ सुरू झाली एकदाची.

(7420742)

🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺

जगात प्रत्येक गोष्ट सुंदर आहे…
मात्र ती तुमच्या विचारांवर आणि बघण्याच्या दृष्टिकोनावर अवलंबून आहे….

💐💐शुभ प्रभात💐💐

🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺

http://www.koshtirn.wordpress.com

🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺

समजगैरसमज…..

एक अतिसंवेदनशील व काळाविपरित अशी पोस्ट व्हाट्सएपच्या माध्यमातून बर्याच वेळा वाचायला मिळाली. ती म्हणजे गुजरात मधे एका लहान भावाने मोठ्या भावाविरुध्द न्यायालयात एक आगळावेगळा खटला दाखल केला. मोठा भाऊ मला आईवडीलांचा सांभाळ करू देत नाही. त्यांना कायम तोच सांभाळतो. माझ्या वाट्याला आईवडीलांना येऊच देत नाही. म्हणून हा खटला दाखल केला होता. आहे कि नाही हा विशिष्ट खटला. या कलियुगात अशी आईवडीलांचा सांभाळ न करण्यासाठी नव्हे तर सांभाळ करण्यासाठी भांडणारी भावंडे या कलीयुगात आगळीवेगळीच आहेत नाही का!!

मा. न्यायाधीश महोदयांना सुद्धा धक्का बसला. शेवटी निकाल लहान भावाच्या बाजूने लागला.

पण यानिमित्ताने काही मुद्दे मनात डोकावून जातात. आईवडील यांचा म्हातारपणी सांभाळ करणे किंवा न करणे याला जवाबदार कोण असते? मुलगा, सून, आई, वडील कि आणखी कोणी.

परिस्थिती कशी असते ते पहाः-

१) आई वडीलांना मुलांमध्ये लुडबुड नको म्हणून वेगळे रहावयाचे असते. तेव्हा ते त्यांच्या स्वतः च्या घरात राहतात व मुलाला स्वतंत्र राहावयास सांगतात.

२) आईवडीलांना स्वतः एकांत किंवा स्वच्छंदी जीवन जगायची इच्छा असते. कोणाचा जांच नको कि भिती नको. पेंशन मिळते. स्वतः चे घर असते. मस्त खायच आणि मौज करायची.

३) काही वेळेला आईवडीलांना सांभाळण्यासाठी सूना तयार नसतात. त्यामुळे मुलांना नाईलाजाने त्यांना वृद्धाश्रमात ठेवणे भाग पडते.

४) काही वेळा मुलगा आईवडील यांचा सांभाळ करण्यासाठी तयार नसतो.

५) घर छोटे असते. मोठे घर घेण्याची ऐपत नसते. मग मुलगा वेगळं भाड्याचं घर घेतो. फक्त झोपण्यासाठी ते असतं. बाकी खाण-पिणं सोबतच असतं.

६) घर छोटे असते.म्हणून मुलगा पूर्णतः वेगळा संसार थाटतो.

७) घर मोठे असते , सर्व सोईस्कर असते पण सूनेला स्वतंत्र संसार हवा असतो.

असे बरेच फेक्टर लागू पडतात. यात नेमके कोणाला जवाबदार धरावे. प्रत्येक परिस्थितीत वेगवेगळी व्यक्ती जवाबदार असते. जवाबदार धरण्याचा प्रश्न ही कधी उदभवेल? जेव्हा आईवडील हतबल आहेत. काम करु शकत नाहीत. पैसे ही नाही. उपाशी रहावं लागतय. तरच जवाबदार कोण हा विचार येतो. नाही का मित्रांनो. आईवडील स्वेच्छेने एकटे रहाणे पसंत करत असतील तर मुलं जवाबदार कसे? मुलं स्वेच्छेने वेगळे रहायचे म्हणत असतील तर आईवडील जवाबदार कसे?

(5320720)

💐💐💐💐💐💐💐💐💐💐💐💐💐💐💐💐

वेळेसोबत चालणे आवश्यक असतेच असे नाही. पण सत्यासोबत चालल्यावर वेळ एक दिवस स्वतः आपल्यासोबत चालायला लागते.

💐💐शुभ प्रभात💐💐

💐💐💐💐💐💐💐💐💐💐💐💐💐💐💐💐

http://www.ownpoems.wordpress.com

💐💐💐💐💐💐💐💐💐💐💐💐💐💐💐💐

जैविक घड्याळ….

घड्याळ टिकटिक करत नाही का मित्रांनो. दिवसा इतर इतके आवाज अवतीभवती असतात कि घड्याळात असलेला सेकंद काटा फिरताना दिसल्यावरच घड्याळ सुरू आहे कि बंद याची खात्री पटते.

पण जसजसी रात्र होते घड्याळाच्या काट्यांचा आवाज सुस्पष्ट ऐकायला येतो.

रात्री बारा नंतर तर घरात फक्त घड्याळाच्या सेकंद काट्याचाच आवाज घुमत असतो. सॉरी, आणखी एक आवाज सतत कानात येत असतो आणि तो म्हणजे रातकिड्यांचा. शहरातील रातकिडे म्हणजे डांस.🦟🦟 गावातील रातकिडे म्हणजे झुरळ किंवा नाकतोडे. अर्थात हे माझे मत आहे. 🦗🦗🦗🦗

मानवी शरीर पण फार विचित्र आहे बघा. जागा बदलली कि झोपच येत नाही. आणि अशा वेळी हमखास घड्याळाची टिकटिक ऐकावी लागते.

अचानक लहानपणाची एक गोष्ट आठवली बघा. पूर्वी घरी घड्याळ नसायचे. सूर्यप्रकाश म्हणजे सकाळ आणि संध्याकाळ. मी कायम रात्री अभ्यास करत होतो. अगदी बालपणापासून. लाईट सुद्धा नसायची घरात. चिमणीच्या प्रकाशात अभ्यास करावा लागत असे. माझे तर इंजिनिअरिंग सुद्धा चिमणीच्या प्रकाशात झाले. शेवटचे तीन वर्ष तर स्ट्रिट लाईटाच्या प्रकाशात. रात्री बारा ते तीन अभ्यास. तोही रस्त्यावर. मग झोप. सकाळी पुन्हा सात वाजता कॉलेज सुरू व्हायचे. सॉरी पुन्हा विषयांतर झाले.

तर लहापणाची ती गोष्ट म्हणजे जैविक घड्याळ⏰. रात्री झोपताना सकाळी किती वाजता उठायचे आहे तितक्या वेळा डोके उशीवर आपटायचे. आपटायचे म्हणजे फुटेल इतक्या जोरात नव्हे.😃😃 अगदी आपल्या डोक्याला समजेल इतक्या जोरात. जर सकाळी पांच वाजेला उठायचे असेल तर पांच वेळा आपटायचे. हमखास सकाळी पांच वाजता जाग येणारच. हा प्रयोग आज ही गरज असेल तेव्हा मी करतो. गजर लावायची गरज भासत नाही. बघा तर मग एकदा हा प्रयोग करून. आणि मला प्रतिक्रियेद्वारा अवश्य कळवा.

(5120718)

⏰⏰⏰⏰⏰⏰⏰⏰⏰⏰⏰⏰⏰⏰⏰⏰

आयुष्याने शिकवलेलं एक वाक्य…
“जिंकलो तर आवरायचं आणि हरलो तर सावरायचं…”

🌼🌹 शुभ सकाळ🌹🌼

⏰⏰⏰⏰⏰⏰⏰⏰⏰⏰⏰⏰⏰⏰⏰⏰

http://www.manachyakavita.wordpress.com

⏰⏰⏰⏰⏰⏰⏰⏰⏰⏰⏰⏰⏰⏰⏰⏰

हास्यारोग्य

नाही नाही, तुम्ही समजताय तसा हा काही रोग नाही. आणि मला वाटतं असा शब्द ही अस्तित्वात नाही. हा मी आताच तयार केलेला नवीन शब्द आहे. हास्य आणि आरोग्य दोघांचे मिश्रण म्हणजे संधी.

खरच हास्य हे आरोग्य ठणठणीत ठेवण्यासाठी योग्य औषध आहे. याचे डोज प्रत्येकाने दररोज दिवसभर किंवा कमीत कमी तीन वेळा तरी घ्यायला हवे. प्रमाण विचारताय राव. आता हे बघा. देवाने प्रत्येकाला दोन गाल, दोन ओंठ, दांत, वाणी, जिव्हा दिले आहेत. जितका शक्य असेल तितका त्याचा वापर करावा.

आपआपल्या ऐपतीप्रमाणे डोज घ्यावा. थोडा जास्त घेतल्याने त्रास काही होत नाही. म्हणजे विपरीत परिणाम काही होत नाही. पण अति डोज नको नाही तर वेड्यांच्या दवाखान्यात न्यावे लागते. हा हा हा.😆😆😆😆. अति तेथे माती असे आपले पूर्वज उगाच म्हणत नसत. आता आम्ही ही म्हणतो. पण एक मात्र नक्की. काही कालावधी नंतर आम्ही ही पूर्वज होणार. तेव्हा आपले वंशज ह्या म्हणी पूर्णतः विसरून गेलेले असणार आणि आपल्याला ही. कारण काळ झपाट्याने बदलत आहे. लोकं चंद्र आणि मंगळावर राहायला जायची स्वप्न बघत आहेत. अहो, चंद्रावरचे प्लॉटपर बुक झालेय म्हणतात. कुठेतरी वाचल्यासारखे वाटतेय. 😆😆😆😆.

(3920706)

💐💐💐💐💐💐💐💐💐💐💐💐💐💐💐

😊 😊

कोणीतरी एका विद्वान महापुरूषाला विचारले, “राग म्हणजे काय ?”
विद्वानाने हसत उत्तर दिले ,”राग म्हणजे दुसऱ्याची चुक असतांना स्वतःला त्रास करून घेणे”

💐🙏🏻शुभ सकाळ🙏🏻💐

💐💐💐💐💐💐💐💐💐💐💐💐💐💐💐

http://www.koshtirn.wordpress.com

💐💐💐💐💐💐💐💐💐💐💐💐💐💐💐

श्रेष्ठ उपासना….

💐 “देवाचं स्मरण होण्यासाठी ज्ञान पाहिजे.”
“ज्ञान होण्यासाठी सदगुरु पाहिजे.”
“सदगुरु मिळण्यासाठी भाग्य पाहिजे.”
“भाग्य मिळण्यासाठी पुण्य पाहिजे.”
आणि पुण्य मिळण्यासाठी
सत्कर्म ही सर्वात श्रेष्ठ उपासना आहे.. 💐 शुभ सकाळ 💐

अशा शुभ संदेश नुकत्याच सेवानिवृत्त झालेल्या महेशरावांना त्यांच्या सौभाग्यवतींनी सकाळी सकाळी पाठवला.

महेशराव ही आता रिकामेच होते. उचलला मोबाईल व रिकामटेकड्या लोकांचा आवडता मित्र म्हणजे व्हाट्सएप उघडला. पहिला संदेश सौ.चाच होता. वाचला व उठले. त्या किचनमधे आहेत हे भांड्यांच्या आवाजावरून त्यांच्या लक्षात आले म्हणून ते किचनात गेले.

“सौ. पोहे करतात वाटतं.” महेशराव.

“नाही, भाजीची तयारी करतेय.” सौ.

“काय. पोह्यांची भाजी.” महेशराव.

“अहो, समोर पोहे दिसत आहे न. ही सकाळची वेळ आहे न.” सौ.

“हो.” महेशराव.

“मग सकाळी पोह्यांचं काय करतात.” सौ. प्रश्नार्थक नजरेने म्हणाल्या.

“पोहे!” महेशराव जोरात हसले.

“मग विचारत का होते.”

“काय.” महेशराव.

“हेच. पोहे करताय वाटतं.” सौ.

“बर ते जाऊ दे. आज तू खूप सुंदर संदेश पाठवला आहेस ग. श्रेष्ठ उपासना.

मग पुण्य मिळवण्यासाठी श्रेष्ठ उपासना करायला हवी की नाही.” महेशराव.

“हो. मग!” सौ. महेशरावांच्या तोंडाकडे प्रश्नार्थक नजरेने बघत राहिल्या.

“अग. मग काय? सत्कर्म करा काही तरी.”

“नेमके काय म्हणायचे आहे तुम्हाला. मला वाटलच होत. घरी बसल्यावर तुम्ही खूप त्रास देणार ते.” सौ.

“अग त्रास कसला आलाय त्यात. फक्त माझा आवडता पदार्थ…..”

“अच्छा. अस होय. मी संदेश पाठवला. ते चुकलंच माझ.”

“अग, तस नाही. असेच नवनवीन संदेश पाठवत जा दररोज.”

“म्हणजे तुम्ही त्यातून काही तरी नवीन अर्थ काढायला मोकळे. मी मात्र कधीच सेवानिवृत्त होणार नाही वाटतं.”

“अग, तस नाही काही. चल हो बाजूला. मी छान से पोहे बनवतो.”

“अहो, मी गंमत करत होते. स्री ही कधीच सेवानिवृत्त होत नसते. कारण ती सर्वांना सेवा देत असते. सासू – सासरे, दीर- जेठ, ननद, नवरा,मुलं, नातवंडे अशा अखंड गोतावळ्यात अडकलेली “ती” आयुष्यात खंड पडेपर्यंत अखंडीतपणे सेवा देण्यातच धन्यता मानत असते. तीला कसली आलीय सेवानिवृत्ती!”

महेशराव मनातल्या मनात पुटपुटले; बिचारी, नवरोबाने जराशी स्तूति केली की खुश होते.

(3720704)

💐💐💐💐💐💐💐💐💐💐💐💐💐💐💐

खरें शोधितां शोधितां शोधताहे।

मना बोधितां बोधितां बोधताहे।।

परी सर्वही सज्जनाचेनि योगें।

बरा निश्चयो पाविजे सानुरागे।।

💐💐💐💐💐💐💐💐💐💐💐💐💐💐💐💐

http://www.manacheslok.blogspot.com

💐💐💐💐💐💐💐💐💐💐💐💐💐💐💐💐💐💐💐💐💐

वहाणा….

मित्रांनो, लहानपणी हा शब्द बराच ऐकिवात होता. आता याचा मागमूस ही नाही. ऐकायला सुद्धा येत नाही. आई माझ्या वहाणा कुठे ठेवल्या आहेत? असे आम्ही कधी आईला विचारले नाही. त्याची दोन कारणं आहेत. एक- आमच्या कडे वहाणा नव्हत्याच मुळी. दुसरे-आमचा काळ म्हणजे १९६० च्या जवळपासचा. तोपर्यंत आम्ही बरेच पुढारलो होतो म्हणून वहाणा ह्या शब्दाचा पर्यायी शब्द प्रचलनात येऊ घातला होता व आम्ही जरी खेड्यात रहात होतो तरी आमच्या कानापर्यंत तो पोहोचला होता. त्याकाळी समाज माध्यमं नव्हती. जसे, टिव्ही, वर्तमानपत्र, मोबाईल, व्हाट्सए, फेसबुक. यापैकी काहीच नव्हतं. म्हणायला वर्तमानपत्रं होती. पण मोजकीच. आणि ती ही फक्त श्रीमंतांच्या आवाक्यातील. आम्ही व आमच्या सारखे गरीब वर्तमानपत्रं विकत घेण्याची कल्पना ही करु शकत नव्हते. असो.

आतापर्यंत आपल्या लक्षात आले असेलच कि वहाणा म्हणजे पादत्राणे. पण पादत्राणे हा फारच उच्च प्रतिचा व दररोजच्या वापरात नसलेला शब्द आहे.

वहाण

यासाठी रोजचा प्रचलित शब्द म्हणजे चप्पल. तो आजही सर्रास वापरला जातो. पण हा शब्द वाहन याशी साधर्मी वाटतो न. यावरून मला वाटते जसे वाहन आपल्याला एका ठिकाणाहून दुसऱ्या ठिकाणी घेऊन जाते तसे ही चप्पल किंवा वहाण सुद्धा आपल्याला एका ठिकाणाहून दुसऱ्या ठिकाणी घेऊन जाते. फरक एकच कि वाहन स्वयंचलित असते. वहाणा मात्र आपल्याला चालवाव्या लागतात. पण काम मात्र त्यांचे सारखेच असते.

( 3620703)

💐💐💐💐💐💐💐💐💐💐💐💐💐💐💐💐

जगातील प्रत्येक गोष्ट सुंदर आहे…
मात्र तीची सुंदरता तुमच्या विचारांवर आणि बघण्याच्या दृष्टिकोनावर अवलंबून आहे.

💐💐शुभ सकाळ💐💐💐💐💐💐💐💐💐💐💐💐💐💐💐💐💐💐

संपत्ती आणि माणुसकी

खरोखर, ज्याने हा स्मॉर्ट फोन आणला म्हणजे तयार केला व ज्याने कोणी हे व्हाट्सएप तयार केले; त्यांना दोघांना ही साष्टांग दंडवत घालायला हवे. कारण स्मॉर्ट फोन नसता तर व्हाट्सएप आले नसते. असो. पण रोज सकाळी इतके सुंदर सुंदर संदेश पाठवले जातात. वाचले किती जातात व त्यावर किती अंमल होते हा संशोधनाचा विषय आहे. उदाहरणार्थ हा खालील संदेश वाचा.

“आयुष्यात एवढी संपत्ती कमवा की दारात उभी राहीलेली संधी आणि दारी आलेला भिकारी रिकाम्या हाती जाता कामा नये त्यासाठी आयुष्यातले काही निर्णय ह्रदयापेक्षा मेंदूला घेऊ द्या परंतु एक गोष्ट सदैव लक्षात ठेवा पैसा कितीही प्रिय असला तरी तो कमावतांना नितीमत्ता आणि माणुसकी कधीच सोडु नका.”
🌹शुभ सकाळ🌹

किती सुंदर व अंमल करण्यायोग्य संदेश आहे हा. यात जास्त आवडले ते “आयुष्यातले काही निर्णय ह्रदयापेक्षा मेंदूला घेऊ द्या.”

आणि

“पैसा कमावतांना नितीमत्ता आणि माणुसकी कधीच सोडु नका

असे बरेच संदेश खूप छान असतात.

हा आणखी एक संदेश वाचा.

“एक कोटी रुपयाचा हिरा अंधारात हरवला त्याला शोधण्यासाठी पाच रुपयाची मेणबत्ती उपयोगी आली. एखाद्या गोष्टीचे महत्व त्याच्या किंमतीवर नसते तर तीच्या योग्य वेळी येणाऱ्या उपयोगावर असते.”

मला नेहमी प्रश्न पडतो कि हे संदेश कोण लिहितो. कारण ९९.९९९९९९% लोकं फक्त आलेले संदेश फॉरवर्ड करण्याचे कर्तव्य करत असतात.( माझ्यासहित)

ह्यावरून एका गोष्टीची मात्र खात्री पटते कि हे जग १००-९९.९९९९९९ याचे जे काही उत्तर येईल त्यांच्या मुळेच व्यवस्थित सुरू आहे. नाही तर हे सुंदर संदेश आपल्याला आलेच नसते. मग या इंटरनेट, स्मॉर्ट फोन आणि व्हाट्सएप हे कसे काय चालले असते. लाखो लोकांचा रोजगार कसा चालला असता? पोट कस भरल असत त्यांनी?

म्हणून मी हे जे संदेश लेखक असतात त्यांना मी मनापासून उद्दंड व निरोगी आयुष्याच्या शुभेच्छा देतो. ते रोज दररोज नवनवीन शुभ संदेश लिहून वायरल करो व त्याला आम्ही सर्व फॉरवर्ड करते तहहयात फक्त फॉरवर्ड करत राहो.

आणि हो स्मॉर्ट फोन बनविणारे व व्हाट्सएपचे निर्माते यांना ही मी मनापासून उद्दंड व निरोगी आयुष्याच्या शुभेच्छा देतो. ते शुभसंदेश लिहणारांसाठी काही असे फिचर्स मोबाईलमधे किंवा व्हाट्सएपमधे आणो कि त्यांना संदेश लिहिणे सहज शक्य होवो. सर्वात महत्त्वाचा घटक म्हणजे शुभसंदेश फॉरवर्ड करणारे यांना असे फिचर्स उपलब्ध होवो जेणेकरून फक्त फॉरवर्ड करण्यात सुद्धा कमीत कमी श्रम पडो, जसे फक्त फॉरवर्ड म्हटले कि संदेश पुढे जावो.

ताजा कलम:

आता ही पोस्ट लिहित असताना खालील संदेश प्राप्त झाला.

उद्याची तारीख अविस्मरणीय असणार आहे

आपल्या सगळ्यांच्याच आयुष्यात परत अशी तारीख येणार नाही

०२ ०२ २०२०

दोन्ही बाजूनी तीच.

(3420701)

🤣😆🤔🤣🤔😆🤣🤔😆🤣🤔😆🤣🤔😆

जगात प्रत्येक गोष्ट सुंदर आहे…
मात्र ती तुमच्या विचारांवर आणि बघण्याच्या दृष्टिकोनावर अवलंबून आहे….

💐💐शुभ प्रभात💐💐

🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺

http://www.koshtirn.wordpress.com

🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺🌺